قانون نافذ کرنے والے اداروں نے داسو کے واقعے پر اپنی چھان بین مکمل کرلی…………راولپنڈی (رپورٹ.اصغرعلی مبارک سے )………وفاقی وزیر داخلہ شیخ رشید نے کہا ہے کہ قانون نافذ کرنے والے اداروں نے داسو کے واقعے پر اپنی چھان بین مکمل کرلی ہے جس میں نو چینی ہلاک ہوئے تھے شیخ رشید نے کہا کہ چینی حکومت نے پاکستان کی جانب سے مجرموں کی تلاش کے لئے کی جارہی تحقیقات پر اطمینان کا اظہار کیا ہے۔ شیخ رشید نے کہا ، “پاکستان اور چین کے مابین غلط فہمی پیدا کرنے کی کوششیں کی جارہی ہیں۔” انہوں نے مزید کہا کہ واقعہ اسی وجہ سے پیش کیا گیا تھا۔ دفتر خارجہ کی جانب سے ایک بیان میں کہا گیا ہے کہ 14 جولائی کو خیبر پختونخوا کے بالائی کوہستان میں مزدوروں کو لے جانے والی ایک بس “مکینیکل ناکامی کے بعد کھائی میں گر گئی”۔ بیان کے مطابق ، چینی کارکن اور اس کے ہمراہ پاکستانی عملہ “ایک جاری منصوبے کے لئے اپنے کام کی جگہ جارہے تھے۔” حادثے کے نتیجے میں نو چینی شہریوں سمیت 12 افراد ہلاک ہوگئے۔ افغان سفیر کی بیٹی والا واقعہ ہماری تفتیش کے مطابق اغوا کا کیس نہیں ہے۔راولپنڈی میں پریس کانفرنس کرتے ہوئے شیخ رشید نے کہا کہ افغان سفیر کی بیٹی کا کیس حکومت لڑے گی لیکن ایک کیس کی بنیاد پر افغان سفیر کو نہیں جانا چاہیے تھا، چاہتے ہیں افغان سفیر خود تحقیقات کا حصہ بنیں، ہم نے واقعے کی ایف آئی آر خود درج کی۔وزیر داخلہ کا کہنا تھا کہ داسو واقعے کی تحقیقات مکمل کرلی ہیں، چینی ہم سے مطمئن ہیں جب کہ عمران خان اسرائیل اور بھارت کو ایک آنکھ نہیں بھاتا، پاکستان کے خلاف ہائبرڈ وار شروع ہوچکی ہے، پاکستان اور چین کے درمیان غلط فہمیاں پیدا کرنے کی کوشش کی جارہی ہے، داسو واقعہ اسی سازش کی کڑی ہے کہ دونوں ملکوں کے درمیان غلط فہمی پیدا ہو۔شیخ رشید نے کہا کہ افغانستان سے متعلق ہماری پالیسی واضح ہے، افغانستان کا معاملہ افغانوں کا ہے، اپنا مسئلہ وہ خود حل کریں، نا ہم افغانستان میں مداخلت کریں گے نا اپنی زمین کسی کے خلاف استعمال ہونے دیں، افغان بارڈر پر 90 فیصد فینسنگ ہوچکی ہے، پاکستانی افواج اور سول ادارے ہر طرح کے حالات کیلئے تیار ہیں۔ان کا کہنا تھا کہ مریم نواز کشمیر میں عمران خان کے خلاف مہم چلا رہی ہیں، وہ ہارنے کے بعد اسلام آباد میں دھرنا دینے کا کہہ رہی ہیں، مریم بڑے شوق سے دھرنا دیں، عمران خان کی قیادت میں یہ ملک آگے بڑھے گا، بحرانوں سے نکلے گا، عمران خان نے کشمیر کیلئے پوری دنیا میں اسٹینڈ لیا، آزاد کشمیر میں بلے کی حکومت بنے گی۔ایک سوال کے جواب میں وزیر داخلہ نے کہا کہ طالبان کے بارے میں دفتر خارجہ بہتر بیان دے سکتا ہے۔
