لائبہ رب نواز جنجوعہ,انٹرنیشنل کراٹے چیمپیئن کواعلیٰ ترین قومی سول اعزاز سے نوازنے کا مطالبہ

لائبہ رب نواز جنجوعہ,انٹرنیشنل کراٹے چیمپیئن کواعلیٰ ترین قومی سول اعزاز سے نوازنے کا مطالبہ
راولپنڈی (خصوصی رپورٹر ) سابق صدارتی امیدوار، ممتاز سیاسی و سماجی رہنما اور چیف ایڈیٹر اے اے ایم نیوز اصغر علی مبارک نے حکومتِ پاکستان، وزارتِ کھیل اور پاکستان اسپورٹس بورڈ سے پرزور مطالبہ کیا کہ پاکستان کی مایہ ناز خاتون اتھلیٹ اور عالمی کراٹے چیمپیئن لائبہ رب نواز جنجوعہ کو مارشل آرٹس کے میدان میں ملک کا نام پوری دنیا میں روشن کرنے پر اعلیٰ ترین قومی سول اعزاز سے نوازا جائے اپنے ایک خصوصی تہنیتی بیان میں سابق صدارتی امیدوار اصغر علی مبارک نے انکشاف کیا کہ لائبہ رب نواز جنجوعہ نے صرف کھیلوں کے میدان میں ہی نہیں بلکہ تعلیمی شعبے میں بھی ملک کا سر فخر سے بلند کیا ہے۔ وہ روٹس انٹرنیشنل اسکولز اینڈ کالجز (RISC) کے لیورپول کیمپس میں بطور استاد (Teacher) اپنے تدریسی فرائض انجام دے رہی ہیں۔ روٹس انٹرنیشنل اسکولز اینڈ کالجز کی پوری فیملی اپنی اس قابلِ فخر معلمہ کی اس تاریخی کامیابی پر جشن منا رہی ہے جو کلاس روم میں نوجوان ذہنوں کی آبیاری کرنے کے ساتھ ساتھ عالمی کھیلوں کے میدانوں میں بھی فتح کے جھنڈے گاڑ رہی ہیں۔لائبہ رب نواز جنجوعہ نے کیوکوشین کراٹے کی تاریخ میں پاکستان کی پہلی خاتون اتھلیٹ ہونے کا منفرد اعزاز حاصل کیا ہے جنہوں نے ایک ہی بین الاقوامی ٹورنامنٹ (انٹرنیشنل کامن ویلتھ کیوکوشین کراٹے چیمپیئن شپ، ازبکستان) میں بیک وقت گولڈ (Gold) اور سلور (Silver) دونوں میڈلز جیت کر ایک ناقابلِ یقین اور گراؤنڈ بریکنگ ریکارڈ قائم کیا ہے۔ ان کی یہ غیر معمولی کامیابی ان کی بے پناہ لگن، لچک اور نظم و ضبط کی عکاس ہے جو کہ روٹس انٹرنیشنل اسکولز (RISC) کے حقیقی جذبے کی ترجمانی کرتا ہے۔اصغر علی مبارک نے لائبہ جنجوعہ کے شاندار کیریئر کی تفصیلات بتاتے ہوئے کہا کہ راجاز مارشل آرٹس ہونبو (Raja’s Martial Arts Honbu)، اسلام آباد سے وابستہ لائبہ جنجوعہ نے ستمبر 2024ء میں اصفہان، ایران میں ہونے والے پہلے ایشین ٹورنامنٹ میں بھی برونز میڈل حاصل کر کے ایشین پوڈیم پر جگہ بنائی تھی، جبکہ حال ہی میں 9 اگست 2026ء کو لاہور میں منعقدہ 5 ویں نیشنل ڈریم کپ کراٹے فیسٹیول میں انہوں نے فیمیل بلیک بیلٹ کاتا ڈویژن میں پہلی پوزیشن اور گولڈ میڈل اپنے نام کیا۔ وہ فروری 2025ء میں مسلسل 20 انتہائی کٹھن فائٹس (Fights) مکمل کر کے ورلڈ سو-کیوکوشین جاپان سے آفیشل بلیک بیلٹ کا رتبہ بھی حاصل کر چکی ہیں۔سابق صدارتی امیدوار اصغر علی مبارک نے روٹس انٹرنیشنل اسکولز کی انتظامیہ اور لیورپول کیمپس کی ٹیم کو بھی مبارکباد پیش کی جنہوں نے لائبہ جنجوعہ کی اس تاریخی کامیابی میں ان کا بھرپور ساتھ دیا۔ انہوں نے حکومتِ پاکستان، وزارتِ کھیل اور پاکستان اسپورٹس بورڈ سے پرزور مطالبہ کیا کہ کلاس روم سے لے کر بین الاقوامی کراٹے رنگ تک پاکستان کا پرچم لہرانے والی اس عظیم بیٹی کی سرکاری سطح پر پذیرائی کی جائے اور انہیں اعلیٰ ترین قومی سول اعزاز سے نوازا جائے تاکہ پاکستان کی دیگر خواتین اتھلیٹس کو بھی آگے بڑھنے کا حوصلہ مل سکے۔